Музыка, кино және халықтар достығы: Әзірбайжанда қазақстандық «Дос-Мұқасан» фильмі ұсынылды
Әзірбайжан астанасы – Бакуде Қазақ киносының айлығы салтанатты түрде ашылды. Шара шымылдығын режиссер Айдын Сахаман түсірген «Дос-Мұқасан» музыкалық драмасы ашты. Ашық аспан астындағы көрсетілім көпшілікке ерекше әсер сыйлап, қазақ музыкасы мен тарихын танытуға мүмкіндік берді. Фильм кеңестік кезеңде елдің музыка өнеріне жаңа серпін берген, қазақ рокының негізін қалаушылардың бірі – «Дос-Мұқасан» ансамблі туралы баяндайды.
Шара аясында әзірбайжандық талантты әншілер мен музыканттардың қатысуымен концерттік бағдарлама ұйымдастырылып, бұл кеш қос халық арасындағы мәдени байланыстың айқын көрінісіне айналды.
Кешке Қазақстан Республикасының Әзербайжан Республикасындағы Төтенше және Өкілетті Елшісі Алим Байел, шығармашылық және ғылыми зиялы қауым өкілдері, дипломатиялық корпус мүшелері, БАҚ, Бакуде тұратын қазақстандықтар мен қазақ киносын қолдаушылар қатысты.
«Дос-Мұқасан» фильмі Ефрат Шәріповтің сценарийі негізінде ҚР Мәдениет және ақпарат министрлігі мен Ұлттық киноны қолдау мемлекеттік орталығының қолдауымен түсірілген. Продюсері – Айгүл Байбек.
Фильм желісі политехникалық институттың студенттері құрған ансамбль тарихын баяндайды. 1967 жылы Павлодар облысында интернационалдық студенттік құрылыс жасағының құрамында жүрген Досым, Мұрат, Қамит және Александр ауылдық клубта алғаш рет қазақ халық әндерін орындап, концерт береді. Осы сәттен бастап олардың шығармашылық жолы басталып, ансамбль «Дос-Мұқасан» деген атауға ие болады. Топтың атауы қатысушылардың есімдерінің алғашқы буындарынан құралған: Досым Сүлейменов, Мұрат Құсайынов, Қамит Санбаев және Александр (Саня) Литвинов.
Фильмде жас музыканттардың өнер мен ғылым арасындағы күрделі таңдауы, концерттерге тыйым салу, партия тарапынан қысым, оқу орнындағы қиындықтар секілді шынайы өмірлік кедергілер көрініс табады.
Кинотуындыда кейіпкерлердің тарихи бейнесін дәл беру үшін актерлер нақты прототиптерге сай таңдалған. Басты рөлдерді Мейірғат Амангелдин, Мақсат Сабитов, Елдос Шайкенов, Саят Мақұлбаев, Айғаным Сағынбаева, Никита Погодаев, Нұрғиса Қуанышбайұлы және Әбілмансұр Серіков сомдады. Сонымен қатар, жобаға Артур Асқарұлы мен Зухра Сайпи сынды танымал блогерлер де қатысып, алғашқы дебюттерін жасады. Фильмнің тарихи шындыққа сай болуын қамтамасыз ету мақсатында ансамбльдің негізін қалаушылар Мурат Құсайынов пен Досым Сүлейменов арнайы кеңесші ретінде шақырылған.
Айта кетейік, Баку қаласында өтіп жатқан Қазақстан киносы айлығы аясында еліміздің заманауи киноөнерінің сан қырын танытатын басқа да туындылардың көрсетілімі жоспарланған.