Қазақстандық «Шатырдағы екеу» фильмі Ресейде өткен фестивальде арнайы жүлдеге ие болды

«Шатырдағы екеу» фильмі Ресейде өткен «В кругу семьи» халықаралық кинофестивалі аясында қазылар алқасының арнайы жүлдесіне ие болды. Фильм SMAG Production кинокомпаниясымен ҚР Мәдениет және ақпарат министрлігі мен Ұлттық киноны қолдау мемлекеттік орталығының қолдауымен түсірілген. Картина ұлттық болмысымен және колоритімен ерекшеленіп, жоғары бағаланды.

Биыл «В кругу семьи» кинофестивалі өзінің 20 жылдық мерейтойын атап өтті. Бұл фестиваль балалар мен отбасылық киноға арналған әлемдегі ең ірі шаралардың бірі болып саналады және ұрпақтар мен мәдениеттер арасындағы диалог алаңы ретінде халықаралық деңгейде мойындалған.

2025 жылы фестиваль рекордтық көрсеткішке қол жеткізді. Оған 121 елден 2500-ден астам фильмге өтінім түсті. Олардың қатарында Қытай, Түркия, Оңтүстік Корея, Италия, Үндістан, Иран, Мексика, Солтүстік Македония елдерінің туындылары бар. Сонымен қатар, фестиваль тарихында алғаш рет Эфиопия мен Сенегалдан да фильмдер қабылданған. Байқау бағдарламасына 36 елден келген толықметражды және қысқаметражды фильмдер енді.

Фестивальде фильмді түпнұсқа музыка авторы, композитор Виктор Сологуб таныстырды. Композитор марапатты бүкіл түсірілім тобының атынан қабылдап, ерекше толқынысын жеткізді.

«Бұл марапат – фильмнің көрермен мен кәсіби қауымдастық тарапынан қолдау тапқанының маңызды белгісі. «Шатырдағы екеу» фильмі күрделі, маңызды тақырыптарды көтереді. Бұл жобаның бір бөлігі болу – мен үшін үлкен мәртебе. Фильм авторларына білдірген сенімі үшін алғыс айтамын, ал қазылар алқасына еңбегімізге жоғары баға бергендері үшін ризамын. Бұл хикая ерекше қажеттіліктері бар адамдарды тереңірек түсінуге және қабылдауға септігін тигізеді деп үміттенемін», – деді ол.

«Шатырдағы екеу» – режиссер Гүлшат Смағұлованың тұңғыш режиссерлік дебюті. Ол 15 жылдан астам кино өндірісі саласында жұмыс істеп келеді. Фильмнің сценарий авторы – Жанна Тимофеева, қоюшы суретшісі – Елена Айтова, ал қоюшы операторы – Александр Плотников. Түсірілім биылғы жылдың көктемінде Алматы қаласы мен Алматы облысы Талғар ауданында өтті. Фильм қазақ және орыс тілдерінде өткен жылы прокатқа шықты.

Туынды тағдыры қиындыққа толы жас жігіт Дамир мен аутизм дертіне шалдыққан жасөспірім Костяның арасындағы достықты баяндайды. Шығармашылық топ картинада инклюзияның маңызын және ерекше балалардың қоғамға бейімделу мәселесін көтерген.

Еске сала кетейік, бұған дейін «Граждане крыши» Ханты-Мансийск қаласында өткен XXIII халықаралық кино-дебюттар фестивалінде «Душа России. Мировое кино» номинациясында жеңіске жеткен болатын.

Сондай-ақ, туынды Үндістандағы «Золотой лев» халықаралық кинофестивалі аясында бірден екі марапатқа ие болды. Олар – «Үздік халықаралық толықметражды фильм» және «Дебюттік фильм үшін үздік режиссура» номинациялары.

Бұдан бөлек, фильм Мәскеуде өткен Fashion Film Festival фестивалінде тоғыз жүлде жеңіп алды.