Жас режиссер Диас Бертистің «Кенжем қайда» әлеуметтік драмасының түсірілімі Қонаевта басталды
Кеше Қонаев қаласында «Кенжем қайда?» көркем фильмінің түсірілім жұмыстары басталды. Дәстүрге сай түсірілімнің басталуына арналған «тәрелке шағу» рәсіміне Ұлттық киноны қолдау орталығының Басқарма төрағасы Құрманбек Жұмағали, Сараптама кеңесінің мүшесі, лттық кино орталығы жанындағы Сараптама кеңесінің мүшесі, медиаменеджер, Қазақстанның еңбек сіңірген қайраткері Нұржан Мұхамеджанова арнайы қатысып, шығармашылық топпен жүздесті.
«Мәдениет және ақпарат министрлігі, Ұлттық киноны қолдау орталығының тарапынан идеологиялық маңызы бар тақырыптарға басымдық беріледі. Өйткені кино тек өнер емес, ол – идеология құралы. Сол себепті отбасылық құндылықтар, ұрпақ тәрбиесі, жауапкершілік пен рухани сабақтастық секілді мәселелерді көтеретін жобалар қашанда маңызды. «Кенжем қайда?» фильмі – дәл осындай өзекті тақырыпты қозғайтын туынды. Бізге бүгінгі жас режиссерлердің осы бағытта ой қозғап, терең әлеуметтік проблемаларды көркем тілмен жеткізуге ұмтылуы үміт ұялатады. Шығармашылық топқа сәттілік тілеймін!», – деді Құрманбек Жұмағали.
Фильм өткен жылғы питчинг нәтижесінде мемлекеттік қолдауға ие болған жобалардың бірі. Оның авторы – «Игрок», «Черный двор», «Приговор» сияқты әлеуметтік тақырыптағы фильмдерімен танылған жас режиссер Диас Бертис (Құлмақов). Оның айтуынша, бұл жолғы туынды отбасы ішіндегі үнсіз шындықтар мен адам жанындағы жараларды көркем тілмен жеткізуді мақсат етеді.
«Бұл – бір ананың баласын іздеу оқиғасы ғана емес, бұл – отбасындағы жанайқай, ішке жиналған реніш пен кешіруге дейінгі күрес туралы драма. Әр көрермен өзіне жақын сезімді бастан кешеді деген сенімдемін,», – деді режиссер Диас Құлмақов.
«Кенжем қайда?» фильмі тағдыр сынынан өткен жалғызбасты ана Гүлнәздың оқиғасын баяндайды. Фильмде кейіпкердің ұлын жоғалтқан сәттен бастап бүкіл отбасының бетпердесі сыпырылып, көп жылдар бойы жиналған үнсіздік пен жасырын жаралар ашыла бастайды. Бұл – детектив элементтері бар психологиялық драма.
Сценарий авторлары – Диас Құлмақов пен Ален Рахметалиев, оператор – Қайрат Темірғалиев, қоюшы-суретші – Камила Нұғманова, продюсерлері – Анар Жүнісова мен Анна Чакиртова.
Айта кетейік, биыл Ұлттық киноны қолдау орталығының қолдауымен 16 фильм өндіріс сатысында. Олардың қатарында «Бүркітші», «Тревожная ночь», «Дни», «38», «Сағындым сені», «Мұғалім», «Команда А», «Жібек», «Победителей видно на старте» және т.б. фильмдер бар.