«Команда А» жобасының шығармашылық тобымен кездесу өтті

Алматы қаласында Ұлттық киноны қолдау мемлекеттік орталығының Басқарма төрағасы Құрманбек Жұмағали әлеуметтік маңызы бар «Команда А» атты анимациялық жобаның шығармашылық тобымен кездесті.

Қазіргі таңда бұл анимациялық фильм «STUDIO CUBIC» ЖШС киностудиясында препродакшн кезеңінде әзірленіп жатыр. Жобаның режиссерлері – Айдын Сахаман мен Расул Гаитов, ал продюсерлері – Дамир Айникеев мен Анна Расщепко.

Кездесу барысында жобаның дайындық кезеңдері мен визуалдық тұжырымдамасы талқыланды.

«Орталық қазақстандық анимацияны дамытуға ерекше көңіл бөледі, әсіресе жас ұрпақты тәрбиелеуге бағытталған жобалар аса маңызды. Кейіпкерлері есте қаларлық, оқиғасы тартымды және тәрбиелік маңызы бар мұндай фильмдер жас көрерменнің талғамын қалыптастырады», – деп атап өтті Құрманбек Жұмағали.

«Команда А» – бұл 14 жастағы қыз баланың отбасымен бірге ойын-сауық планетасына жасаған сапары туралы шытырман оқиға. Жолда олар күтпеген жерден бөтен ғаламдық қауіппен бетпе-бет келеді. Басты кейіпкер ата-анасын құтқарып, жер бетіндегі адамдарды қауіптен сақтандыруға тырысады. Оның серіктері – робот мысық пен бөтен планетадан келген досы. Фильм отбасылық құндылықтарды, достықты және батылдықты дәріптейді.

Жоба 2024 жылы Ұлттық киноны қолдау мемлекеттік орталығы ұйымдастырған питчинг барысында іріктеліп, мемлекеттік қаржыландыруға ие болған әлеуметтік маңызы бар фильмдер қатарына енді.