Ресейдегі фестивальде екі қазақстандық фильм ұсынылды

Альметьевск қаласында (Татарстан Республикасы, Ресей) «Каракуз фильм» халықаралық кинофестивалінің ашылуы өтті. Фестиваль бағдарламасына Қазақстан, Өзбекстан, Тәжікстан, Грузия және Ресейдің әртүрлі өңірлерінен келген отыздан астам фильм енді.

Фестивальдің шымылдығын ҚР Мәдениет және ақпарат министрлігі мен Ұлттық киноны қолдау мемлекеттік орталығының қолдауымен түсірілген «Шатырдағы екеу» фильмі ашты. Фильмді фестиваль аясында продюсер Әлия Шәріпбаева таныстырып, көрермендермен шығармашылық кездесу өткізді. Продюсер түсірілім процесі туралы әңгімелеп, аудиторияның сұрақтарына жауап берді.

Фильмнің сценарий авторы – Жанна Тимофеева, қоюшы суретшісі – Елена Айтова, ал қоюшы операторы – Александр Плотников. Кинода Елдар Әбіш, Александр Черепанов, Лидия Ярцева (Ресей), Ольга Ландина, Евгений Задорожнев, Жанна Қуанышева, Дәулет Кекілбаев, Бағлан Нүрекенова сияқты жас әрі танымал актерлер ойнайды. Түсірілім жұмыстары Алматы қаласы мен Алматы облысы Талғар ауданында жүргізілген. Өткен жылы фильм Қазақстанда қазақ және орыс тілдерінде прокатқа шықты. Картина тағдыры қиындыққа толы жас жігіт Дамир мен аутизм дертіне шалдыққан жасөспірім Костяның арасындағы достықты баяндайды. Шығармашылық топ картинада инклюзияның маңызын және ерекше балалардың қоғамға бейімделу мәселесін көтерген.

Фестиваль аясында француз күресінен әлем чемпионы атанған алғашқы қазақ – Қажымұқан Мұңайтпасов туралы баяндайтын «Қажымұқан» фильмі де көрсетілді. Ол – халықаралық, ресейлік және бүкілодақтық чемпионаттарда аса ауыр салмақ дәрежесінде жеңіске жетіп, елуге жуық медаль иеленген тарихи тұлға. Картина аңызға айналған спортшының ерлігі мен ұлттық мақтанышқа айналған жолын көрсетеді және ол ҚР Мәдениет және ақпарат министрлігінің, Ұлттық киноны қолдау орталығының қолдауымен түсірілген.

Фильм режиссері Қанағат Мұстафин оның сценарийін 2012 жылы жаза бастаған. Түсірілім жұмыстары 2020 жылы басталды. Жобаға он жылдан астам уақыт бойы жүргізілген зерттеу жұмыстары негіз болған.

Айта кетейік, «Каракуз фильм» – көрерменнің өзі қазылық ететін жеті күндік кинофестиваль. Байқау бағдарламасында алты номинация қарастырылған: «Үздік көркем фильм», «Үздік деректі фильм», «Үздік анимациялық фильм», «Үздік қысқаметражды фильм», «Балалар көзайымы жүлдесі», «Каракуз фильм» Гран-приі және бес арнайы жүлде.

Фестивальге қазақстандық фильмдердің қатысуы ұлттық кинематографияға деген қызығушылықты ғана емес, оның халықаралық мәдени кеңістіктегі өсіп келе жатқан маңызын да көрсетеді.